महाराष्ट्रात 23 जूनपासून मान्सून सक्रिय? IMDचा नवा अंदाज

महाराष्ट्रात 23 जूनपासून मान्सूनच्या प्रगतीला वेग येण्याची शक्यता. दक्षिण महाराष्ट्र, मराठवाडा आणि पुण्यासाठी IMDचा महत्त्वाचा अंदाज.

मुंबई : महाराष्ट्रातील नागरिक आणि शेतकरी गेल्या अनेक दिवसांपासून पावसाच्या प्रतीक्षेत आहेत. राज्यात नैऋत्य मोसमी पावसाच्या प्रगतीला मोठा खंड पडला असून आता 23 जूनपासून मान्सून पुन्हा सक्रिय होण्याची शक्यता भारतीय हवामान विभागाने (IMD) व्यक्त केली आहे. यामुळे पावसाची वाट पाहणाऱ्या लाखो नागरिकांना आणि शेतकऱ्यांना मोठा दिलासा मिळण्याची शक्यता आहे.

तळकोकणात 6 जून रोजी मान्सून दाखल झाला होता. मात्र त्यानंतर दक्षिण महाराष्ट्रात त्याची प्रगती मंदावली. गेल्या 12 दिवसांपासून मान्सूनचा प्रवास जवळपास ठप्प झाला आहे. त्यामुळे राज्यातील अनेक भागांमध्ये पावसाअभावी पाणीटंचाईची समस्या निर्माण झाली आहे.

ठाकरेंच्या फुटीर खासदारांच्या घराबाहेर सुरक्षा वाढवली; पोलिसांचा कडक बंदोबस्त 

23 जूनपासून मान्सूनच्या प्रगतीला वेग?

भारतीय हवामान विभागाच्या ताज्या अंदाजानुसार, महाराष्ट्रासह तेलंगण, ओडिशा, झारखंड, बिहार आणि छत्तीसगडच्या काही भागांमध्ये 23 जूनपासून मान्सूनच्या प्रगतीला वेग मिळू शकतो.

हवामान विभागातील तज्ज्ञ सुदीप कुमार यांनी दिलेल्या माहितीनुसार, दक्षिण महाराष्ट्रात 22 जूनपासून पावसाचा जोर वाढण्याची शक्यता आहे. दरम्यान, जुलै आणि ऑगस्ट महिन्यातील पावसाच्या स्थितीबाबतचा सविस्तर अंदाज जूनअखेरीस जाहीर केला जाईल.

: एल निनोचा मान्सूनवर परिणाम

मात्र, पुणे शहर आणि परिसरात येत्या तीन ते चार दिवसांत हवामानात फारसा बदल होण्याची शक्यता नसल्याचेही त्यांनी स्पष्ट केले आहे.

यंदा एल निनोच्या प्रभावामुळे देशातील अनेक भागांमध्ये मान्सूनच्या प्रगतीवर परिणाम झाल्याचे हवामान तज्ज्ञांचे मत आहे.

यामुळे महाराष्ट्रात अपेक्षित प्रमाणात पाऊस झाला नाही. परिणामी खरीप हंगामातील पेरण्या मोठ्या प्रमाणात रखडल्या आहेत. अनेक भागांतील शेतकरी अद्याप पावसाची प्रतीक्षा करत आहेत.

तसेच धरणांमधील पाणीसाठा मर्यादित असल्याने सिंचनासाठी पाण्याचा वापर नियंत्रित करण्यात येत आहे. त्यामुळे शेतीसाठी आवश्यक पाणी उपलब्ध होण्यावरही परिणाम होत आहे.

मराठवाड्यात पेरण्या रखडल्या

मराठवाड्यात यंदा सुमारे 48 लाख हेक्टर क्षेत्रावर खरीप पेरणीचे नियोजन करण्यात आले आहे. मात्र आतापर्यंत केवळ 10 हजार हेक्टर क्षेत्रावरच पेरणी झाली आहे.

त्यामध्ये कापूस पिकाची लागवड सर्वाधिक 5,294 हेक्टरवर झाली आहे. सिंचन सुविधा असलेल्या शेतकऱ्यांनी काही प्रमाणात पेरणी केली असली तरी बहुतांश शेतकरी पावसाच्या प्रतीक्षेत आहेत.

सोयाबीन, तूर, मका, बाजरी आणि मूग या प्रमुख पिकांच्या पेरण्या अद्याप रखडलेल्या आहेत. शिवाय जिल्हानिहाय पाहिल्यास जालना जिल्ह्यात 1,880 हेक्टर तर बीड जिल्ह्यात 3,502 हेक्टरवर पेरणी झाल्याची माहिती समोर आली आहे.

22 जूननंतर मराठवाड्यात पावसाची शक्यता

भारतीय हवामानशास्त्र विभागाच्या अंदाजानुसार, मराठवाड्यातील आठही जिल्ह्यांमध्ये 22 जूननंतर वातावरणात बदल होऊ शकतो.

काही ठिकाणी मेघगर्जनेसह हलका ते मध्यम स्वरूपाचा पाऊस पडण्याची शक्यता व्यक्त करण्यात आली आहे. त्यामुळे शेतकऱ्यांना खरीप हंगामाच्या पेरण्या सुरू करण्यासाठी अनुकूल परिस्थिती निर्माण होऊ शकते.

अखेर अनेक दिवसांच्या प्रतीक्षेनंतर राज्यात मान्सून सक्रिय होण्याची चिन्हे दिसू लागली आहेत. पुढील काही दिवसांतील हवामानातील बदलांवर संपूर्ण महाराष्ट्राचे लक्ष लागले आहे.

FAQ

Q. महाराष्ट्रात मान्सून पुन्हा कधी सक्रिय होणार?
A. भारतीय हवामान विभागानुसार 23 जूनपासून मान्सूनच्या प्रगतीला वेग मिळू शकतो.

Q. दक्षिण महाराष्ट्रात पाऊस कधी वाढणार?
A. 22 जूनपासून दक्षिण महाराष्ट्रात पावसाचा जोर वाढण्याची शक्यता आहे.

Q. मराठवाड्यात पेरणीची स्थिती काय आहे?
A. 48 लाख हेक्टरपैकी केवळ 10 हजार हेक्टरवर पेरणी झाली आहे.

Q. एल निनोचा काय परिणाम झाला?
A. एल निनोमुळे मान्सूनची प्रगती मंदावली असून पावसाचे प्रमाण कमी राहिले आहे.

Q. पुण्यात पुढील काही दिवस पावसाची शक्यता आहे का?
A. हवामान विभागानुसार पुढील 3 ते 4 दिवस पुण्यात पावसाची शक्यता कमी आहे.